Dadansoddi

Ar waelod grisiau symudol


Ffion Dafis

Amser darllen: 4 munud

07·03·2018

Bu fy rhaglen ddiweddaraf ar S4C, Bras, Botox a'r Bleidlais, yn rhan o fis o raglenni yn cofnodi a dathlu can mlynedd ers i rai merched gael yr hawl i bleidleisio. Roedd yr hawl hwn yn benllanw degawdau o orymdeithio, brwydro a phrotestio (gwaedlyd ar brydiau) gan ferched o bob math o gefndiroedd a oedd yn gweld yr anghyfiawnder amlwg yn eu cymdeithas. Rydym yn ymwybodol o’r Cymry a fu’n rhan o fudiadau protest y Swffragetiaid a’r Etholfreintwyr. Dyma'r mudiadau protest a'n harweiniodd at un o’r newidiadau mwyaf yn hanes merched y byd. Roedd cael gafael mewn baner a wnaethpwyd ac a gariwyd gan ferched mudiad protest Cymreig, yn un o orymdeithiau mwyaf y cyfnod, yn brofiad a barodd falchder i mi ac i un o gyfranwyr gwych y rhaglen, y ffynnon egni a gwybodaeth, Sara Huws o Amgueddfa Cymru. Yr oedd y ddwy ohonom yn cyffwrdd â hanes wrth fyseddu gwaith llaw merched a oedd, drwy ddycnwch ac arddeliad, wedi ei gwneud hi’n bosib i ni allu ystyried, pwyso a mesur, a dathlu eu cyfraniad.

Wrth gynhyrchu rhaglen fel hon, mae dod o hyd i'r naratif yn hollbwysig. Cafwyd cymaint o gyfweliadau arbennig gan gyfranwyr huawdl ar draws Cymru fel y gallai’r rhaglen fod wedi dilyn nifer o lwybrau. Yn hytrach nag adrodd stori brwydr merched drwy hanes, penderfynwyd canolbwyntio ar ferched a oedd wedi creu argraff bersonol arna i. I mi, mae pob un o'r merched yn y rhaglen hon yn ymgorffori beth yw bod yn ffeminydd; maent yn cyd-gredu yn yr egwyddor fwyaf sylfaenol, yr egwyddor fwyaf amlwg i mi, sef cydraddoldeb.

Mi allwn i gymryd y cyfle yn y fan hon i egluro pam fod pob cyfrannydd wedi hawlio ei lle ar y sgrin fach. Mi allwn i hefyd drafod fy mhersbectif fy hun ar fod yn ffeminydd a pham ei bod hi’n hanfodol ein bod ni’n cofio proses mor araf a llafurus oedd hi i gyrraedd lle ydan ni heddiw, a pham bod brwydrau newydd yn mynnu hawlio eu lle dro ar ôl tro, sut bod rheidrwydd arnom i ddal i ddiffinio a datblygu hawliau merched yn wyneb rhwystrau newydd. Ond mae 'na ferched eraill mwy huawdl na mi wedi crisialu hynny mewn erthyglau gwych dros y misoedd diwethaf.

Yr hyn a gaiff fy sylw yn y darn hwn yw ymateb cyn-gydweithiwr y deuthum wyneb yn wyneb ag o yn y brifddinas, wrth ffilmio delweddau ar gyfer y rhaglen hon. Wedi iddo ofyn beth yn union yr oeddwn i’n ei ffilmio ac i minnau egluro gogwydd y prosiect fe welais bâr o lygaid rhy gyfarwydd yn araf drafeilio i dop ei ben, rhyw wên fach fychanol yn ffurfio ar ei wefusau cyn iddo sbowtio allan ohonyn nhw'r frawddeg, 'Oh yes, it’s the ‘in’ thing at the moment, isn’t it!'

In Thing.

Yr oedd y syniad o raglen yn ymwneud â materion merched wedi creu delwedd negatif, ddi-werth a oedd yn amlwg, er hynny, yn ddraenen dawel yn ystlys y cyn-gydweithiwr ac mi roedd yn ddigon i gau'r caead yn glep ar ein sgwrs.

In Thing.

Yr oedd y llygaid a gollodd ddiddordeb yr eiliad honno wedi rhoi rhaglen a oedd yn trafod materion benywaidd yn yr un categori â sgertiau ra-ra, y fit bit a gwyliau mewn tipi. Yn y foment hon, fe welais y rhywiaeth ddyddiol y mae cymdeithas wedi ei thrwytho ynddi, sydd yn fyw ac yn iach hefyd ar waelod grisiau symudol yng nghanolfan Dewi Sant.

Yr hyn sydd wedi dod i'r amlwg yn sgil dyfodiad mudiadau protest diweddar ydy faint mae codi llais yn cythruddo ac yn bygwth carfan eang o ddynion. Dynion sydd hefyd, yn anffodus, wedi dangos eu lliwiau a’u hagweddau cyndyn ar blatfformau cyhoeddus yma yng Nghymru. Sut ar y ddaear ydan ni fod i newid pethau os nad ydy rhai dynion yn fodlon newid, drwy wrando a cheisio rhoi eu hunain yn sgidiau merched am funud ddau, yn hytrach na chymryd tro amddiffynnol?

Nid rhyw chwarae plant ydy’r materion sydd wedi codi eu pennau hyll yn ddiweddar; nid wrth fod yn boléit a gofyn yn neis y mae cymdeithas yn mynd i newid. Allwn ni ddim aros yn ein hunfan. Rhaid bod yn agored i syniadau newydd a newid y naratif. Mae’n angenrheidiol ein bod yn addysgu ein hunain a chael gwared ar agweddau ffosiledig os ydynt yn anghyfiawn – nid eu cyfiawnhau. Peryglwyd ein hawliau fel merched yn rhy hir ac mae’n amser agor ein llygaid i gydnabod y breintiau amlwg y mae un garfan wedi eu mwynhau, ac arnofio arnynt, ar draul y llall.

Yn hytrach na chwyddo fel porciwpeinod a phoeni am y bygythiad, y mae’n bryd i ambell ddyn ymlacio, gwrando, a gwir ystyried pam fod safbwynt neu brotest yn ei anesmwytho. Mae rhywun yn gallu cael ei siomi'n aml gan agwedd aelod o deulu, ffrind, colofnydd neu gydweithiwr, ond mae’n amser i balu’n ddwfn a gwir ystyried agweddau sydd wedi cael llonydd yn rhy hir i lysnafeddu yn nyfnderoedd tywyll yr ymwybod.


Cyfrol ddiweddaraf Ffion Dafis ydi Syllu ar walia' (Y Lolfa, 2017).


Mae O’r Pedwar Gwynt yn gyhoeddiad annibynnol. Mae pob tanysgrifiad a chyfraniad yn hynod werthfawr wrth geisio sicrhau dyfodol llewyrchus i’r cylchgrawn.


 

Categorïau:

Ffion Dafis, Ffeministiaeth

 


Nid rhyw chwarae plant ydy’r materion sydd wedi codi eu pennau hyll yn ddiweddar; nid wrth fod yn boléit a gofyn yn neis y mae cymdeithas yn mynd i newid

Dyddiad cyhoeddi: 07·03·2018

Yn ôl i frig y dudalen

Adolygu


Guto Dafydd

Mae cerddi arobryn cadair a choron eleni’n gweddu i’r dim i’r brifwyl agored, orfoleddus, herfeiddiol a gafwyd ym Mae Caerdydd. O ran arddull, maent yn hygyrch – yn rhwydd i’w darllen, a throeon ymadrodd yn pefrio oddi ar y dudalen. O ran cynnwys, maent yn…

Dadansoddi


Nathan Abrams

Ydw i o'r farn bod Jeremy Corbyn yn wrth-Semitaidd? Nac ydw. A yw'n fygythiad dirfodol i Iddewon y Deyrnas Unedig? Nac ydi. Ydi maniffesto Llafur yn wrth-Iddewig? Nac ydi. A oes gan Corbyn broblem gydag Israel? Oes, mae ganddo. Ond nid…

Adolygu


Ruth Richards

Wrth i gamerâu cryno a rhad gyrraedd y farchnad ar ddiwedd y bedwaredd ganrif ar bymtheg, gwelwn y cwmni Kodak yn anelu eu nwyddau at ferched ifanc. Dyma grŵp demograffaidd a elwir ganddynt yn 'Kodak Girl', enw sy'n cyfleu a manteisio ar feiddgarwch ac…

Dadansoddi


Annwyl Olygyddion,

Yn yr awyrgylch anoddefgar sydd ohoni, hoffwn dynnu eich sylw at garreg fedd go arbennig ym mynwent Bethesda Manod, Blaenau Ffestiniog. Yn wynebu'r Moelwyn Mawr ceir carreg fedd syml o lechfaen 'Stiniog gyda'r arysgrif canlynol arni: In Loving Memory of Professor Achill Rappaport of Vienna,…

Dadansoddi


Fflur Arwel

Bore digon tebyg i’r arfer oedd y bore Sadwrn hwnnw yn y Shaftesbury Hand Car Wash yng Nghasnewydd. Roedd haul Mehefin yn crasu'r tarmac ac arogl coffi rhad yn cymysgu gyda sebon wrth i’r gweithwyr fynd ati i lanhau’r ceir. Yn eu plith yr oedd dyn ifanc tair ar hugain mlwydd oed o’r enw Mustafa Dawood.…

Adolygu


Diane Bailey

Fel cyfanwaith, mae'r arddangosfa hon yn rhoi i ni bortread o gymoedd de Cymru, heb y bobl. Meddai Stokes, ‘I was well into this endeavour before I saw that the Valleys people were absent. Or were they?' Mewn gwrthgyferbyniad gyda'r tai teras twt a…

Dadansoddi


Huw L Williams

Eisteddfod hamddenol oedd hi fod. Roedd y maes, yn gyfleus iawn, nepell o fy nghartref yn Grangetown. A minnau wedi cael hen ddigon o ruthro'n chwyslyd rhwng gormod o bebyll yn Eisteddfodau'r blynyddoedd diwethaf y bwriad y tro hwn oedd mwynhau’r adloniant,…

Adolygu


Elin Meredith

Nofel a ddatblygir ar gynfas eang yw Taith yr Aderyn. Mae’n ein tywys i diroedd pell, i fyd o lynnoedd, mynyddoedd a choedwigoedd. Dyma'r byd digyfnod y lluniodd Alun Jones yn wreiddiol yn Lliwiau’r Eira (Gomer, 2012). Mae’r amwysedd o ran lleoliad a chyfnod yn ei gosod ar wahân i…