Dadansoddi

Dal dwylo yn y glaw

Cofio Tony Bianchi


Jon Gower

03·07·2017

Ond chwarae teg iddo, dyw e ddim yn danto. Ac o roi ei ddwylo ar y llawr wedyn mae’n llwyddo i’w sadio’i hun. Mae’n tynnu anadl ddofn. ‘Fffff…’ Ac un arall. ‘Fffff…’ A’r anadlu fel petai’n dweud, ‘Wel dyna rhyddhad, dyna ollyngdod, ar ôl yr holl boen a thrallod ...’

Tony Bianchi, o’i stori fer, ‘Eric ’n’ Ernie’

Mae rhywun yn cofio Tony Bianchi fel dyn hynod o annwyl a chariadlawn, pob sgwrs ag e’n werthfawr – ac yn siŵr o gynnwys sôn am lyfrau. Os taw canlyniad i ddarllen yw ysgrifennu, hawdd deall sut y medrai Tony ’sgrifennu cymaint a ’sgrifennu mor dda. Oherwydd roedd yn darllen yn eang, yn gyson a chyda brwdfrydedd heintus. Os clywoch chi raglen Stiwdio ar Radio Cymru, pan fu Tony a Catrin Beard yn trafod eu hoff llyfrau, byddwch yn gwybod yn iawn sut y gallai Tony eich cyfeirio at bethau ardderchog i’w darllen.

Roedd yn awdur athrylithgar a luniodd nofelau niferus, a’r rheini’n dra soffistigedig – cyfrolau doeth a chwareus ar yr un pryd, a enillodd iddo Wobr Daniel Owen (Pryfeta yn 2007) a’r Fedal Ryddiaith (Dwy Farwolaeth Endaf Rowlands yn 2015). Dechreuodd ’sgrifennu yn weddol hwyr yn ei fywyd. Roedd y nofel Esgyrn Bach (Y Lolfa, 2006) yn gyfle iddo ddial ar Gyngor Celfyddydau Cymru a’i ddiwylliant bryd hynny o archwilio ariannol cyson a boddi creadigrwydd dan ddogfennaeth. I’r perwyl hwnnw, aeth Bianchi ati i greu’r Weinyddiaeth er Hyrwyddo Buddiannau Strategol y Celfyddydau sy’n argymell ‘Trigain Cam Namyn Un Tuag At Lwyr Effeithlonrwydd Gweinyddol’ ac sy’n cynnwys ‘Adran Dryloywder ac Atebolrwydd’.

Mae teitl ei gasgliad o straeon hunangofiannol Cyffesion Geordie Oddi Cartref (Gomer, 2010) yn ein hatgoffa taw brodor o Ogledd Lloegr oedd hwn a aeth ati nid yn unig i ddysgu Cymraeg ond i’w meddiannu’n llwyr. Roedd coethder ei eirfa ar lafar ac mewn print yn destun rhyfeddod; meddiannodd y Gymraeg i’r fath raddau nes iddo ennill cystadleuaeth yr englyn yn yr Eisteddfod ddwywaith ac mae sawl enghraifft yn tŷ ni o englynion cyfarch Tony i ddathlu achlysuron fel dyweddïo, priodi a geni plant. Ond roedd dyfnder ei wybodaeth a’i ddiléit mewn barddoniaeth i’w weld yn gliriach ac yn ehangach yn y detholiad o gerddi a olygydd ar ran Barddas, Blodeugerdd Barddas o Farddoniaeth Gyfoes (2005).

Mewn cyfweliad gyda Click on Wales, esboniodd Tony ei fod yn gwbl ffyddiog bod ysgrifennu mewn ail iaith wedi gwneud iddo ’sgrifennu’n well. ‘Mae dysgu iaith yn debyg iawn i wisgo mwgwd. Pan y’ch chi’n dysgu iaith newydd mae’n rhaid i chi fihafio fel tasech chi’n berson gwahanol. Yn eich iaith gyntaf mae hi’n hawdd suddo’n ddwfn i’ch byd mewnol eich hun, ond wrth ’sgrifennu yn Gymraeg mae’n haws taflunio’r hyn sy’n eich poeni chi ar gynfas wahanol.’

Roedd Tony hefyd yn feirniad craff ar y naw. Astudiodd waith Samuel Beckett ar gyfer ei ddoethuriaeth ym Mhrifysgol Llambed ac fe ’sgrifennodd lyfr hefyd am Richard Vaughan, yng nghyfres ‘Writers of Wales’. Heb sôn am ysgrifau hynod o dreiddgar fel ‘R S Thomas and his Readers’ (yn Wales: The Imagined Nation, gol. Tony Curtis, 1986) a’i asesiad o lenyddiaeth Eingl-Gymreig, ‘Aztecs in Troedrhiwgwair: Recent Fictions in Wales’ (Peripheral Visions: Images of Nationhood in Contemporary British Fiction, gol. Ian Bell, 1995).

Os oes yna un ddelwedd o Tony sydd yn dod i’r meddwl yn syth bin, dyma hi: pan fyddai ef a’i gymar Ruth yn croesi’r hewl, byddai’r ddau ohonynt yn dal dwylo cyn neidio oddi ar ymyl y pafin, fel dau yn eu harddegau. Ac fe fydden nhw’n mwynhau gwneud hynny hyd yn oed yn fwy os digwydd iddi fod yn bwrw glaw, er mwyn osgoi’r pwdeli gyda'i gilydd. Dyn ifanc 65 mlwydd oed ydoedd, a meddai ar frwdfrydedd yr ieuanc wrth ddod o hyd i gerddoriaeth newydd neu wrth iddo ddringo mynyddoedd. Ond roedd yn meddu hefyd ar yr angerdd hwnnw sy’n peri i bobl frwydro ac ymgyrchu: gweithiodd Tony yn ddiflino yn rhan o’r Mudiad Gwrth-Apartheid yng Nghymru.

Cydymdeimlwn â Ruth, ac â’i ferched, Rhiannon a Heledd, a’i wyrion a’i wyresau i gyd, a oedd yn caru dad-cu fel yr oedd cynifer o’i ddarllenwyr yn caru ei ryddiaith.

Efallai y gall Samuel Beckett gynnig diweddglo i’r ysgrif hon, ar ddiwrnod pan mae ’na gysgod dros yr haul, a’r diwrnod yn wag ac yn fyrrach rhywsut:

It is right that he too should have his little chronicle, his memories, his reason, and be able to recognize the good in the bad, the bad in the worst, and so grow gently old down all the unchanging days, and die one day like any other day, only shorter.


Mae Jon Gower yn awdur a darlledwr. Ei gyfrol ddiweddaraf yw Rebel, Rebel (Y Lolfa, 2016).


Mae O'r Pedwar Gwynt yn gyhoeddiad annibynnol. Mae pob tanysgrifiad a chyfraniad yn werthfawr - na, yn anhepgor - wrth geisio sicrhau dyfodol llewyrchus i'r cylchgrawn.


 

Categorïau:

Jon Gower, Teyrnged, Tony Bianchi

 


'Mae dysgu iaith yn debyg iawn i wisgo mwgwd. Pan y’ch chi’n dysgu iaith newydd mae’n rhaid i chi fihafio fel tasech chi’n berson gwahanol.'
Tony Bianchi

Dyddiad cyhoeddi: 03·07·2017

Yn ôl i frig y dudalen

Dadansoddi


Huw L Williams

Mae’r penderfyniad i streicio gan staff prifysgolion ledled Cymru a’r Deyrnas Gyfunol, yn wyneb y bygythiad newydd i gynllun pensiwn prifysgolion, yn codi cwestiynau sylfaenol am rôl y Brifysgol fel sefydliad. Mae hyn ar ben cynlluniau diswyddo sydd ar waith ar raddfa syfrdanol ac sydd…

Dadansoddi


Nerys Williams

Yn y chwedegau, anogwyd 'Mamau America' i yrru eu plant i'r sinema gan y bardd Americanaidd Frank O'Hara – yn chwareus felly. O leiaf byddai gobaith wedyn na fyddent yn stelcian yn eu llofftydd 'yn eich casáu cyn pryd, a chithau ddim wedi gwneud dim byd rhy…

Cyfansoddi


Marion Muller-Colard

Mae'r stori hon i blant gan Marion Muller-Colard, a gyhoeddwyd yn wreiddiol yn Ffrangeg (2014), yn cyflwyno syniadau Hannah Arendt (1906-1975) ar ffurf hanesyn a lluniau unigryw gan Clémence Pollet. Mae'r athronwraig ar fin gorffen sgwennu ei llyfr olaf, ond wrth iddi bendroni dros y…

Cyfansoddi


Robert Walser

Cyhoeddodd Robert Walser ddarnau cyson ym mhapur dyddiol y Berliner Tageblatt yn 1907-8 ac yn y cyfnod 1925-1933, gan gynnwys 'Llythyr gan Ewropead' ym Mai 1926. Mae nifer o'r darnau hynny ar ffurf llythyr sy'n cyfarch y darllenydd yn bersonol, yn lythyrau caru sydd wedi eu cyfeirio at foment ddychmygol. Yn wir, yn 1930, penderfynodd y papur wahodd nifer o…

Dadansoddi


Daniel Huws

Mae canu'n ymestyn lawer pellach yn ôl yn ein hanes nag ysgrifennu. Genir canu yn y cof ac yn y cof y'i diogelir. Cof sy'n gwneud dyn. Mae grym y cof dynol yn rhywbeth y mae pawb ohonom wedi cael achos o bryd i'w gilydd i…

Dadansoddi


Huw L Williams

Nid ysgeler yw pob llais o'r ochr draw i Glawdd Offa. Yn ddiweddar, bûm yn ddigon ffodus i fynychu sesiwn benigamp Cymru dros Ewrop, yng nghwmni Anthony Barnett, sef cyfarwyddwr y mudiad Charter 88 a sefydlydd y wefan wych OpenDemocracy. Buodd yng Nghaerdydd yn…

Cyfansoddi


Mihangel Morgan

Rwy wedi golygu a diwygio wrth ailadrodd y stori ryfedd hon a gefais gan Merfyn Taylor y diwrnod hwnnw. Ac ers y siwrne drên honno bûm yn ddigon ffodus i gael gafael ar atgofion anghyhoeddedig Mona Moffat ei hun trwy law Dr…

Adolygu


Alun Llwyd

Ymhell bell yn ôl, cefais drip gorau'r flwyddyn i Bookland yn Wrecsam i brynu blwyddlyfr y cylchgrawn pop, Sgrech. Darganfyddais pwy oedd yn chwarae'r gitâr fâs i Trobwll, darllenais am (ond chlywais i ddim nodyn gan) T Dunlop Williams, a daeth 'canu pop Cymraeg' yn air yn ogystal â…