Dadansoddi

Tri pheth ar feddwl Geraint Løvgreen


Geraint Løvgreen

Amser darllen: 2 funud

21·02·2018

1.

Y Tad (diolch i Mari)

Ers tro bellach dwi’n cymryd rhan mewn gornest flynyddol ar y slei yn erbyn Mari, y ferch: dwi a hithau’n cystadlu ar ba un bynnag o destunau ysgrifenedig yr Eisteddfod Genedlaethol sy’n cymryd ein ffansi. Yn 2016, er mawr sioc imi, cefais wobr ym Mhrifwyl y Fenni am gyfieithu drama wych Florian Zeller, Le Père, o’r Ffrangeg – hynny efo fy Ffrangeg Lefel-A, geiriadur Harrap’s a Google Translate yn gymorth. Ar ôl sawl sgwrs fuddiol gydag Arwel Gruffydd, Cyfarwyddwr y Theatr Genedlaethol, braint fwy fyth rŵan fydd gweld y gwaith yn cael ei lwyfannu yn Pontio ac wedyn yn teithio ledled Cymru. Mae hi’n ddrama ddoniol o drist – a dryslyd – ar sawl lefel, yn bortread craff a gonest o gyflwr dementia. Dwi’n dechrau cynhyrfu wrth feddwl am weld fy ngeiriau’n cael eu llefaru ar lwyfan broffesiynol gan rai o actorion gorau’r genedl. A minnau erbyn hyn yn ddigon hen i fod yn berchen bus pass, dydi hi byth yn rhy hwyr i fwynhau profiad newydd sbon.

Dyfan Roberts yn un o ymarferion Y Tad, Theatr Genedlaethol Cymru

2.

Symud tŷ (diolch i Gwil)

Mae’r mab hynaf Gwil, a Ffion ei wraig, yn byw ryw ddau ganllath o’n tŷ ni yng Nghaernarfon. Wrth i’w meibion Ifor a Huw dyfu mae eu tŷ nhw’n mynd ychydig yn gyfyng iddyn nhw. Mae’n tŷ ni, ar y llaw arall, yn un mawr braf efo gardd helaeth – yn dŷ teulu, a dweud y gwir, yn hytrach na thŷ i bâr o bensiynwyr. Felly mae’n gwneud synnwyr iddyn nhw symud i fama, yn tydi, ac i Eleri a finnau symud i le ’chydig llai (ond ddim llawer llai!) heb ardd. A dyna ’yden ni’n ’neud. Ond mae gadael yn mynd i fod yn anodd. Mae dyddiad y symud mawr yn prysur nesáu ac mae’n syndod gymaint o ’nialwch sydd wedi casglu yn stafelloedd yr hen dŷ dros yr ugain mlynedd y buom yn byw yma mor ddedwydd. Mae bywyd erbyn hyn yn gyfres o dripiau i’r siopau elusen efo bocseidiau o lyfrau a gemau bwrdd a ... wel, stwff.

3.

Breuddwydio (diolch i Gruff)

Mae’r symud tŷ ’ma wedi rhoi taw ar unrhyw syniad oedd gen i am fynd i Beijing a Nanning ym mis Mawrth i wylio gemau pêl-droed Cwpan Tsieina. Un o fanteision mawr dilyn tîm pêl-droed Cymru ydi cael mynd efo Hywel fy mrawd i wledydd na faswn i’n meddwl mynd iddyn nhw fel arall, ac mi fasai Tsieina yn sicr wedi ticio’r bocs hwnnw. Ond am y tro, dwi’n gorfod gadael y trafaelio i Gruff, y trydydd plentyn, sy’n deithiwr brwd ers iddo dreulio bron i flwyddyn yn mynd o amgylch y byd yn ei ugeiniau cynnar. Golygydd ffilm llawrydd ydi o, yn gweithio’n galed am fisoedd er mwyn cronni cyfnodau rhydd digon hir i gael mynd ar ei drafels i rywle pell. Dyna ’i bethe fo. Felly, am eleni, dim ond breuddwydio a wna i, a phicio draw i Facebook bob yn hyn a hyn i fwynhau lluniau gwych Gruff, sy’n crwydro De Affrica ar hyn o bryd. 
 


Geraint Løvgreen a drosodd ddrama Florian Zeller Le Père i'r Gymraeg. Mae cynhyrchiad Theatr Genedlaethol Cymru ohoni yn agor yn Pontio, Bangor ar 21 Chwefror 2018. Bydd yn teithio ledled Cymru. Enillodd y ddrama wobr Molière 2014 yn Ffrainc. Gellir darllen mwy amdani ar wefan Theatr Genedlaethol Cymru.

Canolfan Celfyddydau Pontardawe: 27 Chwefror 7.30yh / 28 Chwefror 11yb
Sgwrs wedi’r sioe 27 Chwefror.

Theatr Felinfach, Dyffryn Aeron: 2 Mawrth 1.00yp a 7.30yh / 3 Mawrth 7.30yh
Sgwrs wedi’r sioe 7.30yh, 2 Mawrth.

Theatr y Lyric, Caerfyrddin: 6 Mawrth 1yp a 7.30yh

Theatr y Sherman, Caerdydd: 8 Mawrth 7.30yh / 9 Mawrth 1.30yp a 7.30yh
Sgwrs wedi’r sioe 8 Mawrth.

Theatr Clwyd, Yr Wyddgrug: 13 Mawrth 7.45yh / 14 Mawrth 1.30 a 7.45yh
Sgwrs wedi’r sioe 13 Mawrth.

Canolfan Garth Olwg, Pentre’r Eglwys, Pontypridd: 16 Mawrth 1yp a 7.30yh
Sgwrs cyn y sioe 1yp i ddysgwyr, yn cychwyn am 12.15yp. Cadeirydd: Helen Prosser.


Mae O’r Pedwar Gwynt yn gyhoeddiad annibynnol. Mae pob tanysgrifiad a chyfraniad yn hynod werthfawr wrth geisio sicrhau dyfodol llewyrchus i’r cylchgrawn.


 

Categorïau:

Theatr, Tri pheth ar fy meddwl

 


A minnau erbyn hyn yn ddigon hen i fod yn berchen bus pass, dydi hi byth yn rhy hwyr i fwynhau profiad newydd sbon

Dyddiad cyhoeddi: 21·02·2018

Yn ôl i frig y dudalen

Dadansoddi


Morgan Owen

Beth yw wyneb poblyddiaeth? Wyneb blinedig, trist, trallodus. Nid yw’r ffromi a’r ysgyrnygu ond crychau egnïol, dros dro, ar y wyneb hwn; yn y dwfn y mae’r casineb yn llechu. A phrin mewn gwirionedd y bydd y casineb hwn yn brigo’n agored yng nghwrs y rhygnu…

Dadansoddi


Bethan Wyn Jones

I mi, un o linellau mwyaf dirdynnol y Gymraeg ydi hon gan Dafydd Namor: ‘Ni ddyly Mai ddeilio mwy.’ Fedra i ddim meddwl am lawer o bethau gwaeth na Mai yn methu deilio. Ond dyma ydi hanfod adroddiad a gyhoeddwyd 6 Mai 2019 gan y…

Adolygu


Rhianwen Daniel

Mae cymhwyso damcaniaeth ôl-drefedigaethol at hanes, diwylliant a gwleidyddiaeth Cymru wedi dod yn gynyddol ffasiynol dros y blynyddoedd diwethaf. Enghraifft newydd o hyn yw llyfr Martin Johnes, Wales: England’s Colony? Yn y gyfrol hon, dadleuir i'r gwrthwyneb na ddylid dehongli’r berthynas rhwng Cymru a Lloegr mewn termau trefedigaethol.

Cyfansoddi


Dyfan Maredudd Lewis

Mi roeddwn innau fel chithau unwaith. Yn ddiriaeth o foleciwlau. Fe’m ganed ac fe’m maged o’r fron fel baban o’ch rhywogaeth chi.

Ystyriwch eich safle yn nhrefn daear, ar ba begwn o’r echel hon ydych chi’n trigo – daioni ynte drygioni? Tybed a yw pegynnau moesoldeb dynolryw mor glir
i…

Cyfansoddi


Casi Dylan

‘Wennol Bwlch a Chilhollt’ Caryl Lewis oedd y stori a’n cyflwynodd ni i’n gilydd. Stori gariad o’r casgliad Plu (2013), wedi ei hadrodd o safbwynt Emrys, mab fferm a glymwyd i’w aelwyd gan amgylchiadau, ac a arhosodd yno yn y gobaith y dôi ei gariad cyntaf ’nôl ato o’i theithio byd: ‘Roedd…

Dadansoddi


Angharad Closs Stephens

Symudais i Abertawe i fyw ddechrau mis Ionawr 2016, yn ystod y gaeaf hwnnw lle bu hi’n bwrw glaw am bron i ddeufis yn ddi-baid. Gyrrais i lawr mewn car benthyg oherwydd fy mod wedi dinistrio fy nghar fy hun naw mis…

Adolygu


Gruffydd Aled Williams

‘Epig o nofel fydd yn byw yn y cof’ meddai Jon Gower mewn broliant ar glawr y nofel hon. Anodd fyddai anghytuno: o ran rhychwant amser a chymeriadaeth dyma’r fwyaf uchelgeisiol o bum nofel Jerry Hunter, ac, fe ddichon, un o’r nofelau mwyaf uchelgeisiol erioed…

Adolygu


Ceridwen Lloyd-Morgan

Bu pobl yn hoff o wneud rhestri erioed. Cymorth i’r cof, mae’n debyg, oedd diben llawer o’r casgliadau o enwau, ffenomenâu, traddodiadau neu wybodaeth arall a fu’n boblogaidd yn yr Oesoedd Canol. Ar wahân i’r Trioedd, lle crynhowyd traddodiadau storïol mewn cyfresi o dri, bu bri ar restri o bump, o saith, naw,…