Cyfweld

Hanfodion y Dolig

Awen Menai, Porthaethwy


Ruth Richards

Amser darllen: 4 munud

25·11·2017

Daeth yn amser i gyrchu hanfodion dianghenraid drachefn; y rhuthr blynyddol am anrhegion Nadolig. Ac os digwydd i chwi fod ym Môn dros y cyfnod hwn, fe welwch fod trefi Biwmares a Phorthaethwy'n prysur gystadlu am y farchnad mewn addurniadau, hylifau a chanhwyllau persawrus, sgarffiau, tlysau – pob math o betheuach sy'n debyg o apelio ar ddiwrnod dilewyrch at y sawl sydd dan bwysau tymhorol i wario ar anrhegion a mân foes bethau.

Ymddengys bod y gornel hon o Fôn yn cael cryn hwyl ar annog ymwelwyr a Monwysion fel ei gilydd i wario. Ceir dwy stryd fawr ffyniannus, yn llawn o siopau bach annibynnol. Lle perffaith – yn unol â'r ystrydeb – i wared rhag cynnwrf a dal ati; a beth well wedyn na photel o olew oglau da gyda phriciau ynddi i wasgaru'n obeithiol ryw chwa fach o foethusrwydd fforddiadwy?

Dwy dref fechan yn ne'r ynys yn anelu am yr un farchnad ydi'r rhain, ond gyda'r Borth yn llwyddo i wneud hynny, os nad yn gwbl Gymreigaidd, yna'n sicr gyda mwy o sylw i naws ei lleoliad a pharch tuag at y farchnad Gymreig. Mae hynny'n siwtio i'r dim y sawl a werthfawroga foesoldeb a moesgarwch gwasanaeth Cymraeg – yn enwedig wrth siopa am hanfodion dianghenraid.

Mae siop Awen Menai, sydd wedi ei lleoli'n glyd ar ganol Stryd Fawr y Borth, yn crisialu'r ddelwedd hon. Mae'n siop ddel, fel pin mewn papur ac yn llawn o gardiau cyfarch Cymraeg y byddech yn falch o'u fframio, heb sôn am eu gyrru; nwyddau gyda chynlluniau map Arolwg Ordnans o Fôn arnynt; tlysau, crochenwaith – a llyfrau, wrth gwrs, sy'n hanfodion angenrheidiol i lawer ac yn enwedig, mi dybiwn, i ddarllenwyr O'r Pedwar Gwynt.

Awen Menai

Mae'r perchennog Rhiannon Elis-Williams yn bendant ei barn mai siop lyfrau'n fwy na dim arall yw Awen Menai, gan gydnabod ar yr un pryd bod yr anrhegion a'r cardiau, nid yn unig yn cynnig ail fusnes, ond hefyd yn ffurfio cyflwyniad atyniadol i Gymru a'i diwylliant. Yn rhyfeddol, nid at ymwelwyr yn unig yr anelir hyn, ond at y sawl sy'n ddihyder eu Cymreictod yn ogystal. Datganiad ysgytiol sy'n dangos maint y gwaith a'r gofal sydd ei angen os am Gymreigio'r stryd fawr a'r byd adwerthu'n gyffredinol.

Fel y byddai rhywun yn disgwyl o ystyried ethos cynhwysol y busnes a'r detholiad gofalus o ddeunydd cyfrwng Saesneg am Gymru, mae cwsmeriaeth y siop yn eang a'r stoc yn apelio at eu cwsmeriaid craidd ac ymwelwyr fel ei gilydd. Dywed Rhiannon fod symud y siop i safle amlycach ar y stryd fawr wedi bod yn fanteisiol o safbwynt denu cwsmeriaid newydd. Bu'n gyfle hefyd i ail-gynllunio'r siop, yn unol â'i delfryd. Gŵr Rhiannon, Ioan, fu'n ymwneud â'r dylunio, a hithau wedyn yn gofalu am y manylion. Ac mae ôl llafur cariad y ddau i'w weld yn glir.

Fel llawer un sy'n dyheu am newid, bu'n freuddwyd gan Rhiannon gael siop ei hun. Dywed gyda gwên ei bod ers blynyddoedd wedi ffansïo ei hun fel Juliette Binoche yn y ffilm Chocolat; a phwy, mewn difri, a welodd y ffilm honno erioed heb feddwl yr un peth? Cyfuniad o hel meddyliau yn ystod seibiant mamolaeth a chydamseriad twt a'i pwniodd i wireddu ei breuddwyd. Digwydd pasio Awen Menai, a meddwl, tybed ...? Yna, gweld yn y papur bro bod y perchnogion blaenorol yn awyddus i werthu'r busnes ac ymddeol. Ac wrth wireddu ei dymuniad, fe sicrhaodd yn ogystal bod modd i bobl de Môn barhau i bicio i'r Borth am lyfrau Cymraeg.

Yn y Borth y magwyd Rhiannon ond, ers agor y siop, dywed ei bod hithau, ei gŵr Ioan a'u dwy ferch yn teimlo eu bod yn agosach nag erioed at galon y gymuned: bod y fenter wedi cadarnhau a sefydlogi eu gwreiddiau yn yr ardal. Mae hynny i'w ddisgwyl ar un wedd, ac eto mae'n dangos mor hawdd yw anghofio neu ddiystyru'r elfen foddhaol hon o redeg busnes teuluol. Mae'n atgoffa rhywun o werth creiddiol busnesau lleol o safbwynt magu cyswllt â'r cwsmeriaid – a thrwy estyniad, wrth gwrs, effaith gadarnhaol hynny ar naws y gwasanaeth.

Er y bod Rhiannon yn parhau i weithio'n rhan-amser fel cyfieithydd, mae'n amlwg bod Awen Menai'n llawer iawn mwy na difyrrwch iddi. Siarada'n angerddol a byrlymus am gynlluniau i adeiladu estyniad i'r siop ac am yr her o greu awydd am lyfrau Cymraeg ymysg plant wrth i gyllidebau ysgolion a llyfrgelloedd grebachu. Ymddiheura wrth basio 'am y golwg'. Pa olwg? yw'r ymateb amlwg, gan nad oes golwg siop lyfrau lychlyd a'i phentyrrau simsan o gyfrolau anhrefnus ar gyfyl Awen Menai.

Mae lle ac apêl i siop lyfrau flêr wrth gwrs, a chanlyniad digon tebyg a geir o siopa yn Awen Menai, sef gadael gyda mwy o helfa na'r bwriad. Fel gydag unrhyw siop lyfrau, mae yma gyfrolau i demtio rhywun i ychwanegu at y rhestr siopa, gyda'r bonws ychwanegol o allu croesi sawl anrheg arall oddi ar y rhestr dymhorol. 


Mae Ruth Richards yn Brif Weithredwr Dyfodol i'r Iaith ac yn rhan o dîm golygu a chynhyrchu O'r Pedwar Gwynt. Gellir darllen pennod o'i nofel Pantywennol (Y Lolfa, 2016) yn y fan hon.


Mae O’r Pedwar Gwynt yn gyhoeddiad annibynnol. Mae pob tanysgrifiad a chyfraniad yn hynod werthfawr wrth geisio sicrhau dyfodol llewyrchus i’r cylchgrawn.


 

Categorïau:

Ruth Richards, Siop lyfrau, Môn

 


Ymddengys bod y gornel hon o Fôn yn cael cryn hwyl ar annog ymwelwyr a Monwysion fel ei gilydd i wario. Lle perffaith - yn unol â'r ystrydeb - i wared rhag cynnwrf a dal ati

Dyddiad cyhoeddi: 25·11·2017

Yn ôl i frig y dudalen

Dadansoddi


Morgan Owen

Beth yw wyneb poblyddiaeth? Wyneb blinedig, trist, trallodus. Nid yw’r ffromi a’r ysgyrnygu ond crychau egnïol, dros dro, ar y wyneb hwn; yn y dwfn y mae’r casineb yn llechu. A phrin mewn gwirionedd y bydd y casineb hwn yn brigo’n agored yng nghwrs y rhygnu…

Dadansoddi


Bethan Wyn Jones

I mi, un o linellau mwyaf dirdynnol y Gymraeg ydi hon gan Dafydd Namor: ‘Ni ddyly Mai ddeilio mwy.’ Fedra i ddim meddwl am lawer o bethau gwaeth na Mai yn methu deilio. Ond dyma ydi hanfod adroddiad a gyhoeddwyd 6 Mai 2019 gan y…

Adolygu


Rhianwen Daniel

Mae cymhwyso damcaniaeth ôl-drefedigaethol at hanes, diwylliant a gwleidyddiaeth Cymru wedi dod yn gynyddol ffasiynol dros y blynyddoedd diwethaf. Enghraifft newydd o hyn yw llyfr Martin Johnes, Wales: England’s Colony? Yn y gyfrol hon, dadleuir i'r gwrthwyneb na ddylid dehongli’r berthynas rhwng Cymru a Lloegr mewn termau trefedigaethol.

Cyfansoddi


Dyfan Maredudd Lewis

Mi roeddwn innau fel chithau unwaith. Yn ddiriaeth o foleciwlau. Fe’m ganed ac fe’m maged o’r fron fel baban o’ch rhywogaeth chi.

Ystyriwch eich safle yn nhrefn daear, ar ba begwn o’r echel hon ydych chi’n trigo – daioni ynte drygioni? Tybed a yw pegynnau moesoldeb dynolryw mor glir
i…

Cyfansoddi


Casi Dylan

‘Wennol Bwlch a Chilhollt’ Caryl Lewis oedd y stori a’n cyflwynodd ni i’n gilydd. Stori gariad o’r casgliad Plu (2013), wedi ei hadrodd o safbwynt Emrys, mab fferm a glymwyd i’w aelwyd gan amgylchiadau, ac a arhosodd yno yn y gobaith y dôi ei gariad cyntaf ’nôl ato o’i theithio byd: ‘Roedd…

Dadansoddi


Angharad Closs Stephens

Symudais i Abertawe i fyw ddechrau mis Ionawr 2016, yn ystod y gaeaf hwnnw lle bu hi’n bwrw glaw am bron i ddeufis yn ddi-baid. Gyrrais i lawr mewn car benthyg oherwydd fy mod wedi dinistrio fy nghar fy hun naw mis…

Adolygu


Gruffydd Aled Williams

‘Epig o nofel fydd yn byw yn y cof’ meddai Jon Gower mewn broliant ar glawr y nofel hon. Anodd fyddai anghytuno: o ran rhychwant amser a chymeriadaeth dyma’r fwyaf uchelgeisiol o bum nofel Jerry Hunter, ac, fe ddichon, un o’r nofelau mwyaf uchelgeisiol erioed…

Adolygu


Ceridwen Lloyd-Morgan

Bu pobl yn hoff o wneud rhestri erioed. Cymorth i’r cof, mae’n debyg, oedd diben llawer o’r casgliadau o enwau, ffenomenâu, traddodiadau neu wybodaeth arall a fu’n boblogaidd yn yr Oesoedd Canol. Ar wahân i’r Trioedd, lle crynhowyd traddodiadau storïol mewn cyfresi o dri, bu bri ar restri o bump, o saith, naw,…